• Agasol renovou a súa directiva nunha asamblea ordinaria celebrada en Santiago de Compostela. O novo presidente, Alejandro Escobar -da empresa Aitire- recolle o testigo de Jorge Vázquez – Redegal- renovando tamén ilusións e achegando novos proxectos para esta nova etapa.

Asamblea de relevo na directiva de Agasol que, non obstante, supón unha continuidade na actividade da asociación en canto a relevo nos proxectos xa iniciados ata o momento. A Asociación de empresas galegas de software libre convocou onte aos seus vinte e nove socios para realizar este trámite e tamén poñer en común a situación actual da asociación.

Un dos puntos principais foi a presentación da memoria de actividades deste ano, así como o balance que en termos de negocio resultou extraordinariamente positivo. Non en van, como xa adiantara Agasol nun comunicado de prensa a comezos deste mes, a asociación que traballa a prol das empresas galegas de código aberto triplicou a súa facturación durante o 2011 con respecto ao exercizo anterior.

Alejandro Escobar, da empresa Aitire, seguirá acompañado na directiva de AGASOL por Xavier Castaño -Igalia-; Mª Xosé Fernández -Dimensiona-; Xaime Garaboa -Signo-; e Francisco González -Péxego-, aos que se une Antón Román de Quobis.

• AGASOL, a Asociación de empresas galegas de software libre triplicou o seu volume de negocio neste último ano.
  

O crecente incremento da demanda de servizos de software libre en Galicia é xa unha tendencia que está a marcar o proceso de evolución das TIC en todos os seus ámbitos.

 A Asociación de empresas galegas de software libre -AGASOL-, que aglutina a vinte e nove das empresas galegas que traballan con sistemas de código aberto, multiplicou por tres este ano o seu volume de negocio. Segundo o seu xerente, Luis Alberto Fernández, este incremento explícase “debido a que cada vez máis as empresas, as administracións e os distintos actores sociais escollen traballar con programas informáticos libres, que poden ser mellorados e adaptados ás necesidades, ao tempo que adoitan ser gratuítos, e por tanto supoñen un importante aforro económico”.

AGASOL é unha entidade especializada na captación de oportunidades para as empresas de software libre fronte ao software privativo. Neste ano 2011, as empresas desenvolvedoras de software libre melloraron notablemente a súa capacidade de actuación, en parte pola boa resposta que se está obtendo de empresas e particulares que escollen a opción de non ten que pagar polas licenzas do software privativo.

A elección de usar software libre no canto de software propietario concede unha total independencia para escoller proveedor, ofrecendo total liberdade de uso e escapando dos monopolios. Coa aplicación de software libre, o empresariado galego optimizará a súa xestión, aforrando o importante custo das licenzas de software privativo.

 AGASOL é a única asociación de empresas galegas que traballan e ofrecen produtos en software libre, que nestes momento contan con 29 asociados. O seu labor é servir de interlocutor entre estas empresas e os potenciais clientes, amais de establecer canles de comunicación e colaboración coas distintas administracións. Precisamente un dos proxectos máis importantes de AGASOL foi o proxecto Abalar, desenvolto en colaboración coa Consellería de Educación, e que procura a integración plena das TIC no ámbito educativo empregando soporte de software libre.

• A edición impresa de Código Cero chega aos seus 100 números no momento no que tamén cumpre dez anos. Neste número publícase unha reportaxe sobre o proxecto Abalar, desenvolvido pola Consellería de Educación e no que tamén colabora Agasol.

Cando se chega ao número cen da edición impresa da publicación Código Cero, Tegnix, unha das empresas socias de Agasol, e encargada -xunto con Igalia- da posta en funcionamento do proxecto, fálanos da aposta que supón Abalar,  en canto ao uso de software libre no ámbito educativo.

Neste número, Tegnix explica o funcionamento do proxecto Abalar, que está sendo implantado en máis de 30.000 computadores de centros educativos galegos, aínda que a previsión é que se triplique nos vindeiros dous anos, sempre empregando software libre.

A través da seguinte ligazón podes consultar esta reportaxe dos socios de Agasol e o número completo de Código Cero.

• O dictame di que os dereitos de autor non protexen as funcionalidades dun programa informático.

• A compañía galega, membro fundador de AGASOL, chega aos seus dez anos de vida cunha traxectoria en crecente proxección do software libre galego en todo o mundo.

O proxecto que comezou no ano 2001 da man dun grupo de estudantes de enxeñería informática da Universidade da Coruña, interesados no software libre e nas súas posibles aplicacións, converteuse hoxe na empresa punteira desta sección das TIC galegas en todo o mundo, cunha impronta galega.

Igalia cumpre dez anos, nos que levou da man o crecemento da súa empresa co desenvolvemento tecnolóxico a través de solucións de software libre; un modelo empresarial netamente galego co que están rachando fronteiras e traballando en proxectos de código aberto de recoñecido prestixio internacional, como GNOME, Linux ou MeeGo. Así mesmo, son destacables os seus traballos con primeiras compañías mundiais, principalmente dedicadas ao eido da telefonía móbil.

Cunha facturación anual que supera os 2 millóns de euros, Igalia é hoxe unha das compañías de referencia das TIC galegas, cunha proxección internacional imparable. O 70% da súa facturación provén de servizos e proxectos internacionais, nos que destaca a súa pegada galega e a marca de calidade de Igalia. Como máximo expoñente da filosofía do código aberto, a colaboración e o intercambio de coñecemento, Igalia é tamén un referente en canto a acción social. Un exemplo do afianzamento destes valores máis aló das iniciativas puramente empresarias é o seu papel como actor social, polo que colabora activamente con ONGs e establece pautas de conciliación familiar e outras facilidades aos seus empregados de cara á mellora da súa calidade de vida.

Agasol felicita a Igalia polos seus dez primeiros anos de vida e polo futuro do software galego, que a través de pequenas ideas, coma a que naceu en Igalia en 2001, xermolan nun futuro escrito en código aberto.

• Un dos máis importantes eventos de promoción do software libre a nivel profesional e empresarial, a LSWC celébrase o mércores 9 e o xoves 10 en Zaragoza.

• Roberto Brenlla, de Tegnix - membro de AGASOL-, presentará o mércores o Centro de Referencia de Formación en Software Libre (CRF SwL) o mércores ás 12h.

Máis de oitenta talleres e conferenciantes nacionais e internacionais concentrarán en dous días en Zaragoza as principais noticias do momento do software libre. Será no marco da LSWC 2011, que se enfocará principalmente a dar a coñecer as últimas novidades empresariais, migracións, ferramentas de xestión e programación en código aberto.

Todas as actividades da LSWC celebraranse no edificio do antigo Seminario Metropolitano de Zaragoza, de xeito ininterrompido durante os dous días, a partires das 09h da mañá. As entidades encargadas da organización do evento son o propio Concello de Zaragoza, así como ASOLIF (da que é membro AGASOL), e o Cluster Pro-entidades do Software libre de Aragón (CESLA).

No marco da LSWC, que ten unha inscrición libre e gratuíta, celebrarase tamén o Joomla Day Spain ZGZ 2011, o encontro anual da comunidade Joomla!, que chega con esta á cuarta edición en España e no que se falará das novidades deste xestor de contidos en código aberto.

Segundo a propia organización, hai xa máis de 600 incritos para participar no que se agarda sexa o maior encontro empresarial sobre o software libre celebrado en España.

Algunhas das empresas adheridas a AGASOL estarán tamén na LSWC 2011. É o caso de Roberto Brenlla, de Tegnix, que o o meŕcores 9, dende as 12h do mediodía, realizará a presentación oficial do Centro de Referencia de Formación en Software Libre (CRF SwL).

A Secretaría Xeral de Modernización e Innovación Tecnolóxica (SXMIT) anunciara o pasado 19 de abril a creación dunha liña de axudas destinadas a fomentar proxectos de carácter tecnolóxico abordados desde a cooperación empresarial, cunha contía total de 2.9 millóns de euros.

Esta liña permitiría que todas as empresas galegas, independentemente do seu ámbito de actividade, puideran introducir aplicacións tecnolóxicas que melloran a súa calidade e produtividade. Unha posibilidade que melloraría a actual situación xa, que todos os indicadores poñen a Galicia na cola en canto a uso de TIC.

A orde publicouse e os proxectos foron presentados dentro do prazo establecido -19 de maio de 2011-, un grande esforzo por parte do sector do software galego para convencer, propoñer e atraer ao tecido produtivo galego para que se acollera a este plan que lle axudaría a desenvolver aplicacións específicas e á medida das súas necesidades e competencias en materia TIC.

A día de hoxe, non temos información ningunha sobre a resolución desta liñas de axuda, o que pode traer graves consecuencias non só para o sector TIC senón para todas as empresas dos distintos sectores que culpan ás propias empresas promotoras. Unha situación de desconfianza que prexudica gravemente ao sector TIC galego que traballa para que o desenvolvemento da sociedade da información e da comunicación en Galicia se poña ao nivel europeo.

Para as patronais do software galego, Agasol, Agestic e Eganet, urxe unha rápida resolución para que o traballo desenvolvido até o de agora non se vexa defenestrado e que a situación de desconfianza no sector TIC non se establezca como premisa para outros sectores empresariais.

Á preocupación xeralizada das empresas súmaselle a inmediatez dos prazos establecidos segundo o artigo 19 das bases da convocatoria: as entidades beneficiarias deberán presentar toda a documentación requirida antes do 15 de novembro, no caso de proxectos dun ano, e antes do 30 de xuño de 2012 para proxectos bianuais.

De non haber unha decisión rápida por parte dos órganos responsables da adxudicación, as empresas veránse na texitura de anular o proxecto presentado ou de apresurarse no seu desenvolvemento, o que non garantiría a calidade inicialmente prevista.

As asociacións empresariais que aglutinan ás empresas do software galego, Agasol, Agestic e Eganet, insisten en que a implantación e o uso das TIC é fundamental para o crecemento económico. Unha realidade que require do compromiso e proactividade das Administracións para que acompasen os ritmos ás necesidades do tecido produtivo.

Os vindeiros días 8 e 9 de novembro desenvolveranse na Facultade de Informática da Universidade da Coruña as “Xornadas de empresa e software libre”, organizadas pola Oficina de Software Libre da propia universidade.

A Asociación de empresas galegas de software libre -AGASOL- abrirá o martes 8 de novembro estas xornadas nas que participarán ademais sete empresas galegas que incorporan o software libre no seu modelo de negocio. O seu exemplo, e as múltiples posibilidades de negocio e oportunidade para as novas empresas a través do software libre serán o cerne principal duns encontros dirixidos aos futuros profesionais das TIC e ao público en xeral que queira coñecer máis sobre as aplicacións de software libre.

Durante estes dous días, e trala intervención de AGASOL, o martes 8 na conferencia inaugural das 10h, expoñeranse os exemplos de empresas punteiras en Galicia que empregan o software libre como elemento de diferenciación e como aposta de futuro. É o caso de Igalia, Corunet e Icarto, que exporán as súas experiencias tamén o día 8. Na segunda xornada será a quenda de Imatia, Quobis, Tagen Ata e Redegal.

As xornadas desenvolveranse entre as 10h e as 13.30h na Aula de graos da Facultade de Informática da UDC. Aínda é posible formalizar a inscrición a través do formulario disposto para tal fin na web da Oficina de Software Libre da Universidade da Coruña.