AGASOL reafírmase no seu total compromiso co Software Libre pois é unha asociación conformada por empresas especializadas nestas tecnoloxías que xera riqueza e traballo de alta cualificación en Galicia.

As empresas e persoas que conforman AGASOL estivemos, estamos e sempre estaremos implicadas coa comunidade de Software Libre colaborando activamente en asociacións sen fins de lucro de todo tipo (grupos de usuarios, tradución, desenvolvemento, organizadoras de eventos, cursos, difusión…), aportando horas de traballo, experiencia e recursos.

AGASOL cre firmemente que o Software Libre é independente de calquera tendencia política pois é un beneficio para a sociedade xeral. AGASOL agradece sinceramente todas as iniciativas xurdidas no pasado e sempre estará aberta á colaboración para que o Software Libre se consolide na comunidade galega.